أحب التمشيه فـي كـل ديـره واحب المشي في جو ٍ خـلاوي
مع نبتـه ونسناسـه وطيـره دوى اللي مايداويـه المـداوي
أشوف العشب وأستنشق عبيره وأسلّي ضيقة القلب الشقـاوي
مع خبت من خبوت الجزيـره خلا ! ماداجه مـدوّر وشـاوي
بعيد مـن القنـوات المثيـره ومن شوف المصايب والبلاوي
ومن هذا الزمان ومن دشيـره هل الدّجه وجلسـات القهـاوي
ومن تشويه الأسماء الشهيـره وتبديل المحاسـن بالمسـاوي
أسج بخـوة وجيـه ٍ سفيـره رجال كلهـم فـوق الهقـاوي
هل الخـوّه بالأيـام العسيـره ولاهم مـن مـدوّرة الحكـاوي
خفاف نفوس وسيوف شطيـره وساع صدور مافيهم قصـاوي
نشاما كل منهم فـي ضميـره يكنّ الخير من قلب ٍ صفـاوي
على اللي ما بعد نزّل سبيـره على قطع الفرج دايم جـراوي
من خيار الموديـلات الأخيـره في اكس ار ٍ كما الحر النداوي
يشق القاع والأرض الغزيـره ويرسي مع صعيبات المـلاوي
لا قفّى يشعق القلب بصفيـره والى اقبل كنّه السيل النحـاوي
بداية يومنـا خيـر ٍ وخيـره مع تيسيـر عـلاّم الخفـاوي
لا صلينا الفجر والضـو نيـره يدور الكيف والتمر الحسـاوي
دلال نحّـرت جمـر الدهيـره وبن ٍ يكسر عماس الشفـاوي
وهرجنا في شريعتنـا المنيـره قبل لاشراق في جـو ٍ نقـاوي
وذكرنـا الله عـلاّم السريـره ولاحدٍ من دعاء ربـه غنـاوي
ولا نذكر على العزبه قصيـره لزومٍ نحتسـي كـل الدعـاوي
ومن حاف الشغل ما أحد ٍ يديره وكل ٍ فـي لزومـه مايـراوي
ورزّينا النصع في أعلى الجديره لين يغدي من الشاطر شـلاوي
وماضي الوقت والخيل المغيره لها من بيننا سـوق ٍ غـلاوي
ونذكر من سير الأمجاد سيـره فعول اهل المواقف والعـزاوي
مثل فعل المهادي مع قصيـره وجدّي يوم صبّحـه العطـاوي
وأبن هادي وأبن هندي وغيره وأخوهملا وفجحـان الفـراوي
وهرج مايجـي فيـه تغييـره رواية راوي ٍ مـن علـم راوي
قضينا أيام لو ما هـي كثيـره لكن يِرجِع بها القلب السنـاوي
ضعيف الراي فيها ما أستشيره ولا أدري من غلاها كم تساوي
سموم القيض والبرد وهجيـره ماتردع لفحة القلب المهـاوي
تعيش الروح في حبه أسيـره وقلبي في هواه اصبح فـداوي
وأنا بين القدر شـره وخيـره قضيت الوقت امـال ومنـاوي
لكن ما ينعش القلـب ويثيـره يكوون البر !! والجوّ الخلاوي
‘‘ ‘‘ ‘‘ ‘‘
وســلامـــتـــكـــم
الإهداءات
الجو الخلاوي 
العرض العادي
